Na casa de Vilancosta (Berres, A Estrada) gardouse un tesouro en forma de textos musicais de distintos estilos e procedencias que pertenceron a varios membros da familia Valladares Núñez (Marcial, Avelina e Serxio).
Máis de cen anos da historia de Galicia, cen anos de música condensados entre os muros desta Casa Grande. Un legado de enorme valor.
Este proxecto pretende contar as historias que agochan esas antigas partituras e desvelar que se esconde tras das súas notas. Músicas que cobran vida de novo, nunha revisión actualizada e persoal, que nos achegan un pouco máis ao retrato do que foi a vida desta familia fidalga do val da Ulla, no seu decorrer “sentiño”.

PABLO BERNÁRDEZ MATO naceu no ano 1976 no lugar do Foxo, do Concello da Estrada. Actualmente vive e traballa en Moraña como mestre de música no CPI Santa Lucía. Comezou estudos de guitarra aos 17 anos, de par da carreira de Educación Musical en Santiago de Compostela. Foi fundador e membro de grupos como Cinemascope e Linho do Cuco, cos que editou os discos, Linho do cuco, 3, Viva, viva! e As alegrías.
Estudou zanfona na Central Folque de Lalín, instrumento co que colaborou en varios proxectos, como Sanfonices (2011), disco homenaxe a Faustino Santalices. En 2019 participou no libro O Ribera de Louzarela, de Quique Estévez, da Central Folque. É membro do Obradoiro de Música Moderna Carlos Barruso e participa como músico en producións da Escola Municipal de Teatro da Estrada, en proxectos como Moa Trío e Moa Dixie Band, e colabora cos grupos de música tradicional Combo Guimaralia e Gallega de Bailables.
En 2021 iniciou o Proxecto Valladares, xunto con Rubén Servide e Cibrán Seixo, para dar a coñecer a música da familia Valladares Núñez, que foi o xermolo deste libro.

HORTENSIA FERNÁNDEZ TORRE naceu en Sión, Suíza, en 1972. É catedrática de ensino secundario na espe cialidade de Debuxo e imparte clase no CPI Aurelio Marcelino Rey García, de Cuntis.
Realizou os estudos de Belas Artes na facultade de Belas Artes de Pontevedra, onde se licenciou nas especialidades de Pintura e Escultura e estivo na Limerick School of Art and Design cunha bolsa Erasmus.
Colaborou nos libros Díxolle o millo á terra (2015) e Tinta de amoras, barcos de noz (2015), realizados polo grupo ORIMAX, e ilustrou o libro Aquiltadas (2012), de Susana Sánchez Aríns.

______

Editorial: Galaxia 01-2024

Idioma: Galego